Hi guest ,  welcome  |  Visit Kvartha  |  Visit Keralaflash  |  Reading Problem? Download Font
Read More Malappuram News
Showing posts with label Airport. Show all posts
Showing posts with label Airport. Show all posts

വിമാനത്തില്‍ പക്ഷിയിടിച്ചു; വിമാനം തിരിച്ചിറക്കി

Written By Malappuram News on Tuesday, May 1, 2012 | 11:23 AM

കൊണ്ടോട്ടി: വിമാനത്തില്‍ പക്ഷിയിടിച്ചതിനെത്തുടര്‍ന്ന് കരിപ്പൂര്‍ വിമാനത്താവളത്തില്‍ നിന്നു ദുബായിലേക്കു പറന്നുയര്‍ന്ന വിമാനം തിരിച്ചിറക്കി. ഇന്നലെ രാവിലെ 153 യാത്രക്കാരുമായി കരിപ്പൂരില്‍ നിന്ന് പുറപ്പെട്ട എയര്‍ ഇന്ത്യയുടെ 937 വിമാനമാണ് അപകടത്തില്‍നിന്നു രക്ഷപെട്ടത്.
വിമാനത്താവളത്തിന്റെ പരിധി വിടും മുന്‍പാണ് വലതു ചിറകില്‍ പക്ഷിയിടിച്ചത്. വിമാനം സുരക്ഷിതമായി ദുബായിലെത്തിക്കാന്‍ കഴിയില്ലെന്നു മനസിലാക്കിയ പൈലറ്റ് കരിപ്പൂരില്‍ തന്നെ തിരിച്ചിറക്കാന്‍ എയര്‍ ട്രാഫിക് കണ്‍ട്രോളില്‍നിന്ന് അനുമതി തേടുകയായിരുന്നു. സന്ദേശം ലഭിച്ചയുടന്‍ ലാന്‍ഡിങ്ങിനു സൗകര്യവുമൊരുക്കി. സുരക്ഷിതമായി ലാന്‍ഡ് ചെയ്ത ശേഷം യാത്രക്കാരെ പുറത്തിറക്കി എന്‍ജിനീയറിംഗ് വിഭാഗം പരിശോധിച്ചപ്പോള്‍ വലതു ചിറകില്‍ കേടുപാടുകളും കണ്ടെത്തി. അറ്റകുറ്റപ്പണികള്‍ നടത്തി ഉടന്‍ തിരിച്ചുപോകാന്‍ കഴിയില്ലെന്നായതോടെ ഈ സര്‍വീസ് റദ്ദാക്കുകയും ചെയ്തു. യാത്രക്കാരെ എയര്‍ ഇന്ത്യയുടെ മറ്റൊരു വിമാനത്തില്‍ ഉച്ചയ്ക്ക് രണ്ടുമണിയോടെ ദുബായിലേക്ക് കൊണ്ടുപോയി.
കരിപ്പൂരില്‍ അഞ്ച് വര്‍ഷത്തിനിടെ ആദ്യമായാണ് വിമാനത്തില്‍ പക്ഷിയിടിക്കുന്നത്. നേരത്തേ ഇത്തരം സംഭവങ്ങള്‍ ഒഴിവാക്കാന്‍ വ്യോമയാന മന്ത്രാലയത്തിന്റെ നിര്‍ദേശപ്രകാരം പക്ഷികളെ തുരത്തുന്ന നടപടികള്‍ ആരംഭിച്ചിരുന്നു. ഇതിപ്പോഴും തുടരുന്നുണ്ട്.
11:23 AM | 0 comments

മലബാറിന്റെ വികസന കുതിപ്പ്

 ലബാറിന്റെ പറക്കാനുള്ള സ്വപ്‌നങ്ങള്‍ക്ക് ചിറകുപകര്‍ന്നത് കരിപ്പൂര്‍ വിമാനത്താവളമാണ്. ഇന്ത്യയിലെ ബ്രിട്ടീഷ് ഭരണത്തിന്റെ അവസാന പതിറ്റാണ്ടുകളില്‍ തന്നെ മലബാറില്‍ വിമാനത്താവളമെന്ന ആശയം ഉദിച്ചിരുന്നു. സൈനികാവശ്യങ്ങള്‍ക്കായി മലബാറില്‍ വിമാനത്താവളം നിര്‍മിക്കാനാണ് വെള്ളക്കാര്‍ ഉദ്ദേശിച്ചിരുന്നത്. എന്നാല്‍ മലബാറില്‍ സ്വാതന്ത്ര്യ സമരം കത്തിയതോടെ ഇത് ഉപേക്ഷിക്കുകയായിരുന്നു. മലബാറില്‍ വിമാനത്താവളത്തിന് അനുയോജ്യമായ സ്ഥലം കൊണ്ടോട്ടിയിലെ കണ്ണങ്കോട്ടുപാറ എന്ന വിശാലമായ ഭൂപ്രദേശമാണെന്ന് സൈനിക മേധാവികള്‍ തന്നെ കണ്ടെത്തിയിരുന്നു. കണ്ണങ്കോട്ടുപാറ ഉള്‍പ്പെടുന്ന പ്രദേശമാണ് കരിപ്പൂര്‍.
ബ്രിട്ടീഷുകാരുടെ തിരിച്ചുപോക്കോടെ നിലച്ച വിമാനത്താവളമെന്ന ആശയം പിന്നീട് പുനരുജ്ജീവിപ്പിച്ചത് കെ പി കേശവമേനോനാണ്. 1977 ഒക്‌ടോബര്‍ എട്ടിന് അദ്ദേഹത്തിന്റെ നേതൃത്വത്തിലുള്ള സംഘം വിമാനത്താവളം യാഥാര്‍ഥ്യമാക്കണമെന്ന മുദ്രാവാക്യമായി കരിപ്പൂരിലേക്ക് മാര്‍ച്ച് നടത്തി. കോഴിക്കോട് നിന്നും ആരംഭിച്ച മാര്‍ച്ചില്‍ നൂറുക്കണക്കിന് ആളുകള്‍ പങ്കെടുത്തു. ഇതൊരു തുടക്കമായിരുന്നു. തുടര്‍ന്നിങ്ങോട്ട് വിവിധ സംഘടനകള്‍ സമരമുഖത്തേക്കിറങ്ങി.
ഒടുവില്‍ ആ സമരങ്ങള്‍ ഫലം കണ്ടു. 1982 മെയില്‍ അന്നത്തെ കേന്ദ്ര വ്യോമയാന മന്ത്രി ആനന്ത് പ്രസാദ് ശര്‍മ വിമാനത്താവളത്തിന് തറക്കല്ലിട്ടു. 1988 ഏപ്രില്‍ 13ന് അന്നത്തെ മുഖ്യമന്ത്രി ഇ കെ നായനാരുടെ അധ്യക്ഷതയില്‍ വ്യോമയാന മന്ത്രി മോത്തിലാല്‍ വോറ കരിപ്പൂര്‍ വിമാനത്താവളം നാടിന് സമര്‍പ്പിച്ചു. മുംബൈയില്‍ നിന്നും എയര്‍ബസ് 737 എന്ന യാത്രാ വിമാനം കരിപ്പൂരില്‍ ലാന്റ് ചെയ്തതോടെ മലബാറിന്റെ പറക്കാനുള്ള സ്വപ്‌നം സാക്ഷാത്കരിക്കപ്പെടുകയായിരുന്നു. ആദ്യ കാലങ്ങളില്‍ ആഴ്ചയില്‍ മൂന്ന് വിമാനങ്ങള്‍ മാത്രമായിരുന്നു മുംബൈയിലേക്ക് സര്‍വീസ് നടത്തിയിരുന്നത്. ഇന്ന് രാജ്യാന്തര വിമാനത്താവളമായി ഉയര്‍ന്ന കരിപ്പൂരില്‍ നിന്ന് ആഭ്യന്തര - അന്താരാഷ്ട്ര സര്‍വീസുകളിലായി ആഴ്ചയില്‍ 300 ഓളം വിമാനങ്ങള്‍ പറന്നുയരുന്നുണ്ട്.
മലബാറിന്റെ ഗള്‍ഫ് അഭിനിവേശം കൊണ്ടാകണം, കരിപ്പൂര്‍ വിമാനത്താവളത്തിന്റെ വികസന പ്രവര്‍ത്തനങ്ങള്‍ ഇന്നും നിര്‍ബാധം തുടരുകയാണ്. നിലക്കാത്തെ വികസന പ്രവര്‍ത്തനങ്ങളുമായി മുന്നോട്ട് പോകുന്ന മറ്റൊരു വിമാനത്താവളവും ഇന്ത്യയിലില്ല. 6000 അടി റണ്‍വേയില്‍ തുടങ്ങിയ വിമാനത്താവളം വീണ്ടും ഭീമി ഏറ്റെടുത്ത് 9000 അടിയായി ദീര്‍ഘിപ്പിച്ചു. ഇതിനിടയില്‍ പുതിയ അന്താരാഷ്ട്ര - ആഭ്യന്തര ടെര്‍മിനലുകളും യാഥാര്‍ഥ്യമാക്കി. നിലവിലുള്ള ടെര്‍മിനലില്‍ സൗകാര്യം മതിയാകാതെ വന്നതോടെ 137 ഏക്കര്‍ ഭൂമി കൂടി ഏറ്റെടുക്കുന്നതിനുള്ള നടപടികളുമായി സര്‍ക്കാര്‍ മുന്നോട്ടു പോകുകയാണ്. പുതിയ അന്താരാഷ്ട്ര ടെര്‍മിനല്‍, കസ്റ്റംസ്, എമിഗ്രേഷന്‍ ഹാള്‍, കാര്‍ പാര്‍ക്കിംഗ് ഏരിയ, എയറോ ബ്രിഡ്ജ് തുടങ്ങിയ ആവശ്യങ്ങള്‍ക്കാണ് പുതുതായി ഭൂമി ഏറ്റെടുക്കുന്നത്.
രാജ്യത്ത് ഏറ്റവും കൂടുതല്‍ വരുമാനം നേടിക്കൊടുക്കുന്ന വിമാനത്താവളങ്ങളില്‍ മൂന്നാം സ്ഥാനമാണ് കരിപ്പൂരിനുള്ളത്. എങ്കിലും മിക്ക ഗള്‍ഫ് സര്‍വീസുകളും കുത്തകയാക്കി വെച്ച എയര്‍ ഇന്ത്യ പലപ്പോഴും യാത്രക്കാരെ ദ്രോഹിക്കുകയാണ്. സീസണ്‍ നോക്കി ചാര്‍ജ് വര്‍ധിപ്പിക്കുക, സമയത്തിനു വിമാനങ്ങള്‍ ഓപ്പറേറ്റ് ചെയ്യാതിരിക്കുക, സര്‍വീസുകള്‍ മുടക്കുക തുടങ്ങിയ ക്രൂര വിനോദങ്ങളാണ് പലപ്പോഴും എയര്‍ ഇന്ത്യയില്‍ നിന്നുണ്ടാകുന്നത്. കിടപ്പാടം വിറ്റും എയര്‍പോര്‍ട്ട് യാഥാര്‍ഥ്യമാക്കാന്‍ തയ്യാറായ പരിസരവാസികള്‍ക്ക് എയര്‍പോര്‍ട്ടിലെ അവിദഗ്ധ തൊഴിലുകള്‍ നല്‍കുന്നതിലും എയര്‍പോര്‍ട്ട് അതോറിറ്റി മുഖം തിരിച്ചിരിക്കുകയാണ്. തൊഴില്‍ നല്‍കുമെന്ന വാഗ്ദാനം ലംഘിച്ച നടപടി പുതുതായി ഭൂമി ഏറ്റെടുക്കുന്നതിനെ ചെറുത്ത് തോല്‍പ്പിക്കുന്നതിലേക്കാണ് എത്തിച്ചത്.

Keywords: Article, Malabar, Airport, Calicut Airport
10:48 AM | 0 comments

വിമാന യാത്രക്കാരന് നഷ്ട പരിഹാരം നല്‍കാന്‍ വിധി

Written By Malappuram News on Saturday, April 7, 2012 | 9:04 AM

മഞ്ചേരി: എയര്‍ ഇന്ത്യ വിമാനത്തില്‍ കുവൈറ്റില്‍ നിന്ന് കരിപ്പൂരിലേക്ക് വരികയായിരുന്നു യാത്രക്കാരന്‍ ഏല്‍പ്പിച്ച 25 കിലോ തൂക്കം വരുന്ന ബാഗ് നഷ്ടപ്പെട്ടതിന് 81500 രൂപ നല്‍കാന്‍ ജില്ലാ ഉപഭോക്തൃ തര്‍ക്ക പരിഹാരം പ്രസിഡന്റ് സി എസ് സുലൈഖാ ബീവി ഉത്തരവിട്ടു. പയ്യനാട് കൈനോട്ടില്‍ വലിയ വളപ്പില്‍ മുത്തുകോയങ്ങളുടെ പരാതിയിലാണ് വിധി. 2010 ഡിസംബര്‍ മൂന്നിനാണ് സംഭവം.
9:04 AM | 0 comments

കരിപ്പൂര്‍ : ഭൂമിനല്‍കുന്നവരുടെ പുനരധിവാസത്തിന് മുന്‍ഗണന

Written By Malappuram News on Friday, March 23, 2012 | 12:39 PM

മലപ്പുറം: കരിപ്പൂര്‍ വിമാനത്താവളത്തിന് ഭൂമിനല്‍കുന്നവരുടെ ഉചിതമായ പുനരധിവാസം ഉറപ്പാക്കിയതിന് ശേഷം മാത്രമേ ഭൂമിയേറ്റെടുക്കല്‍ നടപടികള്‍ പൂര്‍ത്തിയാക്കൂയെന്ന് ജില്ലാ കലക്ടര്‍ എം സി മോഹന്‍ദാസ് ഉറപ്പുനല്‍കി.
വിമാനത്താവള വികസനത്തിന് ഏറ്റെടുക്കുന്നത് കൂടാതെ പുനരധിവാസത്തിനായി 20 ഏക്കര്‍ കൂടി ഏറ്റെടുക്കും. ഈ ഭൂമിയില്‍ വെള്ളം, വൈദ്യുതി, റോഡ് തുടങ്ങിയ അടിസ്ഥാന സൗകര്യങ്ങള്‍ സര്‍ക്കാര്‍ ഒരുക്കിയതിന് ശേഷം മാത്രമേ നിലവിലുള്ള ഭൂമിയില്‍ നിന്ന് മാറേണ്ടതുള്ളൂവെന്നും കലക്ടര്‍ അറിയിച്ചു. ഭൂമി ഏറ്റെടുക്കുന്നത് സംബന്ധിച്ച് ഭൂവുടമകളുമായി ചേംബറില്‍ നടന്ന ആദ്യഘട്ട ചര്‍ച്ചക്ക് പള്ളിക്കല്‍ വില്ലേജിലെ 30 പേര്‍ക്കാണ് നോട്ടീസ് നല്‍കിയിരുന്നത്. ഇതില്‍ 26 പേര്‍ യോഗത്തില്‍ പങ്കെടുത്തു. ആകെ 242 പേരില്‍ നിന്നാണ് ഭൂമി ഏറ്റെടുക്കേണ്ടത്. എല്ലാവര്‍ക്കും അഭിപ്രായം പറയാന്‍ അവസരം നല്‍കുന്നതിനാണ് ചെറിയ സംഘങ്ങളായി ചര്‍ച്ചക്ക് വിളിച്ചത്. അടുത്ത ഘട്ടത്തില്‍ 50 പേരെ ചര്‍ച്ചക്ക് വിളിക്കും.
ജനവാസ കേന്ദ്രങ്ങളെ ഒഴിവാക്കി വിമാനത്താവളത്തിനോടനുബന്ധിച്ച് കിടക്കുന്ന ഒഴിഞ്ഞ സ്ഥലവും സ്വകാര്യ കോളജിന്റെ ഉടമസ്ഥതയിലുള്ള സ്ഥലവും ഏറ്റെടുക്കണമെന്നായിരുന്നു ഭൂവുടമകളുടെ ആവശ്യം. സമര സമിതിയുമായി എയര്‍പോര്‍ട്ട് അതോറിറ്റി അധികൃതര്‍ ചര്‍ച്ചക്ക് തയ്യാറാവണമെന്നും ബദല്‍ നിര്‍ദേശങ്ങള്‍ അംഗീകരിക്കണമെന്നും ഭൂവുടമകള്‍ ആവശ്യപ്പെട്ടു. ഭൂവുടമകള്‍ ഉന്നയിച്ച അഭിപ്രായങ്ങള്‍ പരിശോധിക്കാന്‍ ജില്ലാ കലക്ടര്‍ ഉടന്‍ സ്ഥലം സന്ദര്‍ശിക്കുമെന്നും അറിയിച്ചു.
സര്‍ക്കാര്‍ 2011 നവംബര്‍ 15 ന് പുറപ്പെടുവിച്ച പുനരധിവാസ പ്രവര്‍ത്തനങ്ങള്‍ സംബന്ധിച്ച ഉത്തരവ് പ്രകാരം 10 സെന്റിന് താഴെ ഭൂമിയുള്ള കുടിയൊഴിപ്പിക്കപ്പെടുന്ന ഓരോ കുടുംബത്തിനും 10 സെന്റ് വീതം ഭൂമി വീട് വെക്കുന്നതിനായി നല്‍കുന്നത് കൂടാതെ സ്ഥലത്തിന്റെ വിലയും നല്‍കും. പുനരധിവസിപ്പിക്കുന്നത് ഭാവിയില്‍ വീണ്ടും എയര്‍പോര്‍ട്ട് വികസനത്തിന് ആവശ്യം വരുന്ന സ്ഥലത്താവില്ലെന്ന് ഉറപ്പാക്കും. കെട്ടിടങ്ങള്‍ പൊളിച്ച് ഉപയോഗ യോഗ്യമായ സാധനങ്ങള്‍ക്ക് വില ഈടാക്കാതെ തന്നെ കൊണ്ടുപോകാന്‍ അനുവദിക്കും. എല്ലാതരം വസ്തുക്കളും ഇത്തരത്തില്‍ കൊണ്ടുപോകാം. ഉഭയസമ്മതപ്രകാരം നിശ്ചയിക്കുന്ന ഭൂമി വില യഥാര്‍ഥ വില തന്നെ ആയിരിക്കുമെന്ന് കലക്ടര്‍ ഉറപ്പ് നല്‍കി. ഏറ്റെടുക്കുന്ന ഭൂമിയിലെ കൃഷി- ഫലവൃക്ഷങ്ങളിലെ വിളകള്‍ ഭൂമി വിട്ടുനല്‍കുന്നതിന് മുമ്പ് തന്നെ ഭൂവുടമക്ക് എടുക്കാം. എയര്‍പോര്‍ട്ടിലോ അനുബന്ധ സ്ഥാപനങ്ങളിലോ ഉണ്ടാകുന്ന ഒഴിവുകളിലേക്ക് കുടുംബത്തിലെ ഒരംഗത്തിന് വിദ്യാഭ്യാസ യോഗ്യതക്കനുസരിച്ച് മുന്‍ഗണന നല്‍കാന്‍ എയര്‍പോര്‍ട്ട് അതോറിറ്റിയോട് ശുപാര്‍ശചെയ്തിട്ടുണ്ടെന്നും കലക്ടര്‍ അറിയിച്ചു. യോഗത്തില്‍ എല്‍ എ എയര്‍പോര്‍ട്ട് ഡെപ്യൂട്ടി കലക്ടര്‍ എം പി കല്ല്യാണിക്കുട്ടി, സ്‌പെഷല്‍ തഹസില്‍ദാര്‍ എ നിര്‍മലകുമാരി, എല്‍ എ ഡെപ്യൂട്ടി കലക്ടര്‍ എം മണികണ്ഠന്‍ എന്നിവര്‍ പങ്കെടുത്തു.
12:39 PM | 0 comments

ജനന തീയ്യതി തിരുത്തി ഷാര്‍ജയിലേക്ക് പോകാന്‍ ശ്രമിച്ച യുവാവ് പിടിയില്‍

Written By Malappuram News on Wednesday, March 21, 2012 | 4:52 PM

കൊണ്ടോട്ടി: ജനന തീയ്യതി തിരുത്തിയ പാസ്‌പോര്‍ട്ടുമായി ഷാര്‍ജയിലേക്ക് പോകാന്‍ ശ്രമിച്ച യുവാവ് കോഴിക്കോട് വിമാനത്താവളത്തില്‍ പിടിയില്‍. ചൊവ്വാഴ്ച പുലര്‍ച്ചെ 4.45 നുള്ള എയര്‍ അറേബ്യയുടെ ഷാര്‍ജ വിമാനത്തില്‍ പോകാനെത്തിയ ചാലക്കുടി ബ്രൈറ്റ് സ്റ്റാറിന് സമീപം പാറോത്തിങ്കപ്പറമ്പ് ഷാജഹാ (28)നാണ് പിടിയിലായത്. എമിഗ്രേഷന്‍ പരിശോധനക്കിടെ പാസ്‌പോര്‍ട്ട് കമ്പ്യൂട്ടര്‍ ഉപയോഗിച്ച് പരിശോധിച്ചപ്പോഴാണ് തട്ടിപ്പ് തെളിഞ്ഞത്. കരിപ്പൂര്‍ പോലീസ് കേസെടുത്ത് മലപ്പുറം ക്രൈം ഡിറ്റാച്ച്‌മെന്റിന് കൈമാറി.
4:52 PM | 0 comments

for MORE News select date here

FREE News by Email വാര്‍ത്തകള്‍ ഇമെയിലില്‍ ലഭ്യമാകാന്‍ ഇമെയില്‍ ഐ.ഡി സബ്മിറ്റ് ചെയ്യുക

Articles

Obituary

Gulf

Followers