അരീക്കോട്: മഞ്ചേരി മെഡിക്കല്‍ കോളജിന്റെ ഉദ്ഘാനം രാഷ്ട്രീയ വിവാദത്തില്‍ മുക്കി ശോഭ കെടുത്തരുതെന്ന് എസ് വൈ എസ് ജില്ലാ പ്രവര്‍ത്തകസമിതി. ജില്ലയിലെ മുഴുവന്‍ ജനങ്ങളുടെയും കൂട്ടായ്മയുടെ ഫലമായാണ് മെഡിക്കല്‍ കോളജ് യാഥാര്‍ത്ഥ്യമായത്. ജില്ലാ പഞ്ചായത്തിന്റെ നേതൃത്വത്തില്‍ നിര്‍മ്മിച്ച പ്രധാന കെട്ടിടത്തിന്റെ നിര്‍മ്മാണം പൂര്‍ത്തിയാക്കിയത് ജില്ലയിലെ സ്‌കൂള്‍ വിദ്യാര്‍ഥികള്‍ ഉള്‍പ്പെടെയുള്ള സാധാരണക്കാര്‍ നല്‍കിയ നാണയത്തുട്ടുകള്‍ ശേഖരിച്ചായിരുന്നു. ഇടക്കാലത്ത് ആശുപത്രിയിലേക്ക് സ്വകാര്യമേഖയുടെ പങ്കാളിത്തം കൊണ്ടു വരാന്‍ നീക്കം നടന്നപ്പോള്‍ എസ് വൈ എസ് ഉള്‍പ്പെടെയുള്ള ജനപക്ഷ സംഘടനകളുടെ ശക്തമായ ഇടപെടലുകളാണ് ആശുപത്രിയെ സര്‍ക്കാര്‍ മേഖലയില്‍ നിലനിര്‍ത്താന്‍ അധികാരികളെ നിര്‍ബന്ധിതരാക്കിയത്. ഇത്തരത്തില്‍ ജനകീയ കൂട്ടായ്മയുടെ ഫലമായി ജില്ലയ്ക്കു ലഭിച്ച മെഡിക്കല്‍ കോളേജിന്റെ തുടക്കം തന്നെ രാഷ്ട്രീയ വിവാദത്തിനുള്ള അവസരമാക്കി മാറ്റുന്നത് നിര്‍ഭാഗ്യകരമാണ്. ഭരണ പ്രതിപക്ഷങ്ങള്‍ വിട്ടു വീഴ്ചക്കു തയ്യാറായി ജനഹിതത്തിനൊപ്പം നില്‍ക്കണമെന്നും ജില്ലയ്ക്കു ലഭിച്ച സൗഭാഗ്യം വേണ്ട വിധം ഉപയോഗപ്പെടുത്തണമെന്നും യോഗം ആവശ്യപ്പെട്ടു. പ്രസിഡന്റ് പികെഎം സഖാഫി ഇരിങ്ങല്ലൂര്‍ അധ്യക്ഷത വഹിച്ചു. പിഎം മുസ്തഫ മാസ്റ്റര്‍, ഊരകം അബ്ദുറഹ്മാന്‍ സഖാഫി, കെടി ത്വാഹിര്‍ സഖാഫി, കൊളത്തൂര്‍ അലവി സഖാഫി, സയ്യിദ് സ്വലാഹുദ്ദീന്‍ ബുഖാരി, അലവിക്കുട്ടി ഫൈസി എടക്കര, കെപി ജമാല്‍ കരുളായി, പിവി മുഹമ്മദ്, എം അബൂബക്കര്‍ മാസ്റ്റര്‍, ടി അലവി പുതുപ്പറമ്പ് എന്നിവര്‍ പ്രസംഗിച്ചു.
Post a Comment