സമരം ശക്തമാക്കുമെന്ന് നഴ്‌സുമാര്‍

മലപ്പുറം: മഞ്ചേരി പ്രശാന്തി ആശുപത്രിക്കു മുന്നില്‍ യുണൈറ്റഡ് നഴ്‌സസ് അസോസിയേഷന്റെ നേതൃത്വത്തില്‍ നഴ്‌സുമാര്‍ നടത്തിവരുന്ന സമരം ശക്തമാക്കുമെന്ന് ഭാരവാഹികള്‍ അറിയിച്ചു. അന്യായമായി പിരിച്ചുവിട്ട രണ്ട് നഴ്‌സുമാരെ തിരിച്ചെടുക്കണമെന്നും മിനിമം വേതനം ലഭ്യമാക്കണമെന്നുമാവശ്യപ്പെട്ടാണ് സമരം. പ്രശ്‌ന പരിഹാരത്തിനായി ജില്ലാ ലേബര്‍ ഓഫീസറുടെ നേതൃത്വത്തില്‍ കഴിഞ്ഞ രണ്ടുദിവസങ്ങളില്‍ ചര്‍ച്ച നടത്തിയെങ്കിലും അശുപത്രി അധികൃതരുടെ നിഷേധാത്മക നിലപാടുമൂലം തീരുമാനമാകാതെ പിരിയുകയായിരുന്നുവെന്ന് നഴ്‌സുമാര്‍ ആരോപിക്കുന്നു. ഇതേത്തുടര്‍ന്ന് വിവിധ രാഷ്ട്രീയ സാംസ്‌കാരിക, യുവജന സംഘടനകളുടെ പ്രതിനിധികളെ ഉള്‍പ്പെടുത്തി സംയുക്ത സമരസമിതി രൂപവത്കരിച്ച് സമരം ശക്തമാക്കുമെന്നും ഇവര്‍ അറിയിച്ചു. വരുംദിവസങ്ങളില്‍ ജില്ലയ്ക്കകത്തുനിന്നും പുറത്തുനിന്നുമുള്ള നഴ്‌സുമാര്‍ സമരത്തില്‍ പങ്കെടുക്കും. 56 നഴ്‌സിങ് സ്റ്റാഫുള്ള ആശുപത്രിയിലെ 45 പേരും സമരരംഗത്തുണ്ടെന്നും രാഷ്ട്രീയ യുവജന സംഘടനകളുടെ പിന്തുണ സമരത്തിനുണ്ടെന്നും ഇവര്‍ പറഞ്ഞു. വാര്‍ത്താസമ്മേളനത്തില്‍ യുണൈറ്റഡ് നഴ്‌സസ് അസോസിയേഷന്‍ സംസ്ഥാന വൈസ് പ്രസിഡന്റ് സുജനപാല്‍, അച്യുതന്‍, യൂണിറ്റ് സെക്രട്ടറി ബെന്‍ജോയ്, പ്രസിഡന്റ് ഷഫീഖ,് മില്‍സി ജോസഫ്, സുബിഷ പി.എസ് എന്നിവര്‍ പങ്കെടുത്തു.

Post a Comment

To be published, comments must be reviewed by the administrator *

Previous Post Next Post